ວິທີການຖ່າຍທອດເຕັກໂນໂລຊີ ຂອງ ສປປ ລາວ ທີ່ຖືກນຳໃຊ້ປະຈຸບັນ ແບ່ງເປັນ 2 ປະເພດຄື: ຖ່າຍທອດຄວາມຮູ້ ແລະ ນຳພາປະຕິບັດຕົວຈິງ. ອີງຕາມຂໍ້ມູນທີ່ໄດ້ຈາກການສຶກສາເຫັນວ່າ ວິທີການຖ່າຍທອດເຕັກໂນໂລຊີ ໂດຍຜ່ານການນຳພາປະຕິບັດຕົວຈິງ ຖືວ່າມີປະສິດທີຜົນ ຖ້າທຽບໃສ່ ວິທີການຖ່າຍທອດເຕັກໂນໂລຊີອື່ນໆ. ຜົນຂອງການສຶກສາໃນຄັ້ງນີ້ ຍັງພົບອີກວ່າ ວຽກງານການຄົ້ນຄວ້າຂອງອົງກອນລັດ ສ່ວນໃຫ່ຍ ແມ່ນການຄົ້ນຄວ້ານຳໃຊ້, ສຳລັບ ສະຖາບັນການສຶກສາແມ່ນໃຫ້ຄວາມສຳຄັນໃນການຄົ້ນຄວ້າພື້ນ ຖານ ແລະ ສ່ວນພາກເອກະຊົນ ແມ່ນອາໃສການນຳເຂົ້າເຕັກໂນໂລຊີຈາກຕ່າງປະເທດເປັນ ຕົ້ນຕໍ. ໃນການສຶກສາຄັ້ງນີ້ ຍັງພົບອີກວ່າ ມີຫຼາຍປັດໃຈທີ່ເປັນທັງຂໍ້ສະດວກ ແລະ ຂໍ້ຫຍຸ້ງຍາກໃນການຄົ້ນຄວ້າ ແລະ ພັດທະນາ. ບັນດາຂໍ້ສະເໜີໃນການຈັດຕັ້ງປະຕິບັດວຽກງານ ຄົ້ນຄວ້າພັດທະນາ ແລະ ການຖ່າຍທອດເຕັກໂນໂລຊີ ຂອງ ສປປ ລາວ ປະຈຸບັນ ເຖິງ 2030 ກໍ່ໄດ້ລະບຸໄວ້ໃນປື້ມຫົວນີ້. ນອກຈາກນີ້ ການປະເມີນວິທີການດຳເນີນການຄົ້ນ ຄວ້າ ພ້ອມຄຳແນະນຳສຳລັບ ບຸກຄົນ, ນິຕິບຸກຄົນ ຫຼື ອົງການຈັດຕັ້ງ ທີ່ມີຄວາມສົນໃຈຈະເຮັດການສຶກສາກ່ຽວກັບການຖ່າຍທອດເຕັກໂນໂລຊີໃນອະນາຄົດ ກໍ່ໄດ້ຖືກນຳສະເໜີເຊັ່ນ ດຽວກັນ.
