ສະຖາບັນນິເວດວິທະຍາ ແລະ ຊີວະເຕັກໂນໂລຊີ, ກະຊວງວິທະຍາສາດ ແລະ ເຕັກໂນໂລຊີ (Biotechnology and Ecology Institute (BEI), Ministry of Science and Technology (MOST) ພວມປະຕິບັດໂຄງການຮ່ວມມືກັບສະຖາບັນ ຊີວະເຕັກໂນໂລຊີ, ສະພາ ວິທະຍາສາດ ແລະ ເຕັກໂນໂລຊີ ຫວຽດນາມ ( Instite of Biotechnology (IBT), Vietnam Academy of Science and Technology (VAST).
ໂຄງການຮ່ວມມືຂອງສອງຝ່າຍດັ່ງກ່າວ ມີຊື່ວ່າ “ການນຳໃຊ້ໂມເລກຸນ ຊີວະເຕັກນິກ ເຂົ້າໃນການວິໄຈພະຍາດ ພືດ ແລະ ສັດ.” ໄລຍະເວລາຂອງການຈັດຕັ້ງປະຕິບັດໂຄງການແມ່ນ 2 ປີເຄິ່ງ ຫຼື 30 ເດືອນ (1/2011-6/2013) ຊຶ່ງງົບປະມານທີ່ໃຊ້ໃນໂຄງການ ແມ່ນ 3.360 ລ້ານດົງ.
ຈຸດປະສົງຂອງໂຄງການ ແມ່ນເພື່ອປັບປຸງພື້ນຖານໂຄງລ່າງຂອງສະຖາບັນ ນິເວດວິທະຍາ ແລະ ຊີວະເຕັກໂນໂລຊີ, ກະຊວງ ວິທະຍາສາດ ແລະ ເຕັກໂນໂລຊີ, ພ້ອມທັງຍົກລະດັບຄວາມຮູ້ ດ້ານວິຊາການສຳລັບພະນັກງານວິຊາການຂອງສະຖາບັນດັ່ງກ່າວ ໃຫ້ມີຄວາມສາມາດໃນການວິເຄາະ ແລະ ຈຳແນກພະຍາດທີ່ເກີດຈາກ ໄວຣັດສ (Virus) ຢູ່ໃນພືດ ແລະ ສັດ.
ກິດຈະກຳຕ່າງໆທີ່ທັງສອງຝ່າຍ ຮ່ວມກັນປະຕິບັດສຳເລັດຜົນໃນໄລຍະທີ່ຜ່ານມາ ປະກອບດ້ວຍ 1) ຝ່າຍຫວຽດນາມ ສຳເລັດການຝຶກອົບຮົມໃຫ້ແກ່ນັກວິຊາການລາວ 8 ຄົນ ໜຶ່ງຄັ້ງ (7-8/2012 ); 2) ຄະນະຊ່ຽວຊານຫວຽດນາມ ແລະ ວິຊາການຂອງຝ່າຍລາວ ໄດ້ລົງເຄື່ອນໄຫວເກັບກຳຂໍ້ມູນ ແລະ ຕົວ ແບບພະຍາດ ພືດ ແລະ ສັດ ຢູ່ແຂວງຈຳປາສັກ.
ນອກຈາກນີ້, ໃນວັນທີ 29/10/2012 ທີ່ ກະຊວງ ວິທະຍາສາດ ແລະ ເຕັກໂນໂລຊີ, ສະຖາບັນຊີວະເຕັກໂນໂລຊີ, ສສ ຫວຽດນາມ ໄດ້ມອບອຸປະກອນການທົດລອງ ແລະ ສານເຄມີຈຳນວນ ໜຶ່ງທີ່ຈຳເປັນໃຊ້ເຂົ້າໃນການວິເຄາະພະຍາດພືດ ແລະ ສັດ ໃຫ້ແກ່ສະຖາບັນນິເວດວິທະຍາ ແລະ ຊີວະເຕັກໂນໂລຊີ, ສປປ ລາວ.
ອຸປະກອນດັ່ງກ່າວ ຊຶ່ງມີ 69 ລາຍການ ມີມູນຄ່າທັງໝົດ 1.930 ລ້ານດົງ.
